Pandan ki tou dimoun pe okipe avek bann preparasyon pour lafet Nwel ek Lannen i annan tandans pour negliz enpe bann mezir prekosyon kont dife e Lazans Servis Tenny Dife ek Sovtaz pe demann dimoun pour a tou moman asire ki zot pe pran tou mezir kont dife.

Msye Jones Madeleine in dir yer ki a sa moman i annan bokou leksitasyon e bokou lalimyer dekorasyon pe ganny aste e i annan tou kalite lalimyer anvant me dimoun i bezwen pran prekosyon ler zot konekte sa bann lalimyer.

“Esey evite konekte zot lo bann extension akoz lamorite sa bann lalimyer i annan de pin e i tant pour las lo extension e sa i kapab koz en dife,” Msye Madeleine i dir.

I osi demann dimoun pour evite kit sa bann lalimyer onn letan zot pa la e osi pour evite kit zot onn pour en katite letan e pour asire ki zanfan pa zwe avek oubyen may ladan.

“Nou tou nou ti ava kontan pas en bon lafet Nwel ek Lannen e personn pa ti ava kontan perdi tou son keksoz e trouv li dan lapenn pour sa bann lafet alor prekosyon i enportan,” Msye Madeleine in dir.

En lot keksoz ki Msye Madeleine in lans lapel ek dimoun pour veye se dan zot lakwizin ki pou tre okipe pandan sa bann letan.

“Bokou manze pou ganny kwi alors evite kit bann kastrol lo dife san sirveyans oubyen bwar pandan ki zot pe kwi manze pour evite tonb dormi pandan ki zot pe kwi manze,” Msye Madeleine in dir.

Antretan Msye Madeleine in dir ki Servis Tenny Dife ek Sovtaz in bouz enn son gro kanmiyon kot sant kominoter Beau Vallon pour fasilit deplwayman anvi konzesyon trafik anka i annan okenn lensidan dan sa rezyon.

Dapre Msye Madeleine depi Novanm ziska la in annan zis trwa ka dife konpare avek nef ka pandan menm peryod lannen pase.

In eksprim swe ki sa i reste parey.