En dife brousay i ganny met anba kontrol atan
En dife brousay dan leo North East Point ti ava’n kapab propaze e vin pli danzere yer apremidi si bann zofisye Servis Tenny Dife ek Sovtaz pa ti’n ariv atan pour met li anba kontrol.
Zofisye relasyon piblik Servis Tenny Dife ek Sovtaz Msye Jones Madeleine in dir ki ti ver 12er10 ki stasyon ti rikord lapel konmkwa i annan en dife dan brousay dan leo North East Point.
I dir zot ti deplway zis en kanmiyon akoz zot pa ti ankor konn gravite sitiasyon. Letan zot ti ariv dan sa landrwa zot ti demann lasistans en lot kanmiyon e antou 20 zofisye ti konbat sa dife pour kapab met li anba kontrol atan pour anpese ki i propaz plis avek divan vannswet ki ti ase for dan sa rezyon.
“Nou ti bezwen osi rod lasistans DRDM ki ti ed nou avek en drone pour konnen ki kantite propaze sa dife ti’n propaze,” Msye Madeleine ti dir.
Fodre dir ki i annan plizyer lakaz dan sa rezyon me menm si dife ti pros avek miray enn sa propriyete, erezman in ganny met anba kontrol atan e person pa’n ganny dimal.
Ti ver 3er30 apremidi ki Msye Madeleine ti dir dife ti’n fini tennyen.
In annan plizyer dife brousay sa lannen me sa enn i pli grav e en pli gran letandi vezetasyon in ganny detri.
Ankor en fwa Msye Madeleine in lans lapel pour dimoun respekte bàn lo met dife ki anfors akoz pandan sa sezon sek e vante i fasil pour dife propaze e al andeor kontrol.
Nou seri portre i montre en pe dega okazyonnen par sa dife brousay yer.