En pick-up i pran dife, en lot i perdi kontrol e kraz en miray
Lapolis in raporte ki dife in konpletman detri kabin en pick-up 3 tonn.
Dapre drayver sa pick-up, en zonm endyen aze 38-an, i ti sorti Pointe Larue e pe diriz fer lavil. An arivan kot highway i ti santi loder brile e vwar lafimen pe sorti dan kabin. Ler i di debarke i ti tann bann ‘spark’ e apre sa kabin ti pran dife.
Lazans servis tenny dife anvil e osi servis tenny dife erport ti entervenir pour tenny sa dife.
Sa lensidan ti ganny raporte 0850 yer kot stasyon lapolis Anse Aux Pins.
Drayver pa’n ganny okenn dimal an rezilta sa aksidan.
Dan en lot aksidan touzour yer, ki ti ganny raporte avek stasyon Mont Fleuri dan 0935, en pick-up 3 tonn ti pe monte ver La Louise e an arivan avan sa kontour kot Kan Frichot, dapre temwen, sa pick-up ti zis konmans desann annaryer kot in frot avek en jeep ki ti osi pe monte, me ki ti’n say li ler i ti war kot i ti pe desann annaryer san control. Sa pick-up ti osi bat dan bann baraz feray e apre kraz miray kot sant sosyal Plaisance avan i ti kapab arete. Drayver sa pick-up ti ganny transporte lopital pour resevwar tretman.