Lazans Servis Tenny Dife ek Sovtaz (SFRSA) in lans son Plan Stratezik pour sa de prosen lannen.

Plan Stratezik SFRSA pour lannen 2017 a 2019 ti lanse dan en seremoni kot batiman Espace Vandredi apremidi.

Pandan seremoni, bann partner dan lalit kont dife ti resevwar en kopi sa plan. Bann ki ti prezan ti enkli reprezantan Minister Zafer Entern, Lapolis, Divizyon Risk ek Zestyon Dezas (DRDM), Sosyete Lakrwa Rouz Sesel, Ladministrasyon Sekirite Maritim (SMSA) ek Lotorite Por.

Komisyonner Lapolis Reginald Elizabeth ek son Konseye Spesyal Sheryl Vangadasamy ti osi prezan.

Nouvo Plan Stratezik SFRSA i kouver bann menm set gran lobzektif ki son predeseser. Sa i: Reaksyon ek lentervansyon; devlopman kapasite ek kalite resours imen; lasante ek sekirite bann zofisye; ledikasyon ek sansibilizasyon piblik; ranforsman kapasite sa lenstitisyon; lekipman ek teknolozi; e lenfrastriktir ek fasilite.

 

Sef Serfis Tenny Dife Andre Morel in dir ki zot in deza realiz bokou keksoz dans sa bann gran lobzektif pandan sa de dernyen lannen. Sa i par egzanp konstriksyon de nouvo stasyon – enn lo La Digue e lot lo Praslin – e lakizisyon kat nouvo masin, enkli en kanmiyon delo avek en kapasite 10 000 lit. Sa i permet annan ase delo ler pe tenny dife, san bezwen al rod delo pli lwen.

Pour sa de prosen lannen, i annan plan pour amelyor lenfrastriktir ek fasilite ki a osi permet anmenn servis plis ver lakominote.

Apard proze pour konstrir en sant lantrennman, sa pou osi atraver konstriksyon kat nouvo stasyon : Anse Royale, Anse Boileau, Persévérance ek Beau Vallon.

Parmi lezot proze, SFRSA i anvizaze osi kontinyen avek bann swivan: Anvoy son bann zofizye formen aletranze; anmenn nouvo masin; sansibiliz dimoun plis lo danze dife avek bann rankont dan lekol, kominote e atraver medya; rekrit kantite ek kalite staf ki bezwen; fer plis legzersis avek partisipasyon bann partner; devlop Teknolozi Lenformasyon (IT); e agrandi servis sirveyans lo lans oubyen ‘life guard’ e anmenn li lo Praslin, La Digue osi ki lezot lans lo Mahé.

Me Msye Morel in dir ki pour SFRSA realiz tou sa, i pou bezwen apir lo zepol son bann zofisye e osi gouvernman.

Donk mon kont lo zot sipor. Nou’n deza akonpli bokou. Me i reste bokou pour fer. Sa nouvo plan stratezik a permet nou kontinyen kot nou’n kite e akonpli sa ki reste pour fer. Si nou kapab zwenn bann target ki dan sa plan, nou pou kapab annan en servis tenny dife pli efikas

Sef Servis Tenny Dife in dir.