Premye dife lakaz i ganny rikorde pour sa lannen
En lakaz an tol in konpletman detri par en dife yer dan semen Roche Bois, St Louis.
Sa i trwazyenm ka dife pour 2018 me i premye ka dife dan lakaz.
Premye ka ti en dife dan en loto e dezyenm dife lo en poto elektrik.
Dapre portparol servis tenny dife ek sovtaz Jones Madeleine sete en koup avek zot pti baba ki ti pe reste dan sa lakaz de lasanm.
«Ti napa personn kot lakour letan ki dife ti pran e sa fanmiy pa’n reisi sov nanryen,» i ti dir.
I ti dir ki rapor ki ti annan sa dife ti antre kot stasyon 3er42 apremidi e deswit trwa kanmiyon avek en lekip 11 zofisye ti ganny deplwaye.
«Letan bann zofisye ti ariv lo lasenn lakaz ti konpletman anflanm e zot ti servi delo pour anpes sa dife propaz dan bann lezot lakour,» i ti dir.