Yer apremdidi lafimen ti’n ranpli dan Church road apre ki dife ti deklare dan salte obor en bin.

Dapre substation officer pour Servis Tenny Dife ek Sovtaz Joe Gabriel, rapor ti antre lo stasyon ver 1er30 pour dir ki ti annan dife OJ Mall.

Trwa kanmiyon avek en lekip apepre 12 zofisye ti ganny deplwaye sorti kot stasyon Santral e ti pran anviron 3 minit pour ariv lo lasenn.

«Ant batiman Maison Ste Claire ek OJ Mall i annan senk bin ki sitye deryer en baro ki personn napa akse avek eksepte propriyeter OJ Mall e dife ti pe pran dan salte ki ti’n ganny depoze akote sa bann bin,» i ti dir.

I ti dir ki zot in dekouver bann bout sigaret anler lo bor sa batiman kot dapre propriyeter OJ Mall bann dimoun i debout kot Maison Ste Claire e zot fimen e apre larg zot sigaret anba.

I ti dir ki kan zot ti ariv lo lasennn dimoun ti deza pe servi hose wheel pour sey tenny dife.

«Dife ti entans dan sa ta salte, si ti aswar i annan en gro posibilite ki ti pou’n pran dan sa de batiman me ti pran nou lekip 5 minit pour met dife anba kontrol e apepre 30 minit pour tenny li konpletman,» i ti dir.

Erezman napa personn ki’n ganny blese.