Dife in detri twatir lasanm en lakaz yer dan vilaz Perseverance 2.

Sa lakaz i pour Msye Ronnie Etheve ki travay kot Hunt Deltel e lanket pe ganny fer pour determin lakoz sa dife.

Ti ver 7er ki Lazans Servis Tenny Dife ek Sovtaz ti ganny alerte lo sa dife kot zot ti deplway trwa masin pour al konbat li.

Msye Etheve i dir i ti pe travay sa letan ler i ti ganny enformen ki ti annan en dife se li.

“Mon ti’n al travay kot Hunt Deltel dan bann 6.45 bomaten ler enn mon zanmi i pase i dir ki dife anler kot mwan in roz. Ler mon monte tou zafer dan lakaz antye in fini tire e met deor. Dan sa lasanm kot dife ti’n pran pa’n kapab sov nanryen. Mon’n perdi tou. I malere pour al rekonmanse,” Msye Etheve i dir.

Portparol Lazans Servis Tenny Dife ek Sovtaz, Jones Madeleine, i dir zot ti pran apepre 2erdtan pour tenny sa dife konpletman.

I ti fer remarke ki sa i 4enm ka dife ki zot in gannyen dan mwens ki 24 erdtan.

“Ler nou ti ariv kot sa ‘duplex’, lake dife anler ti ase entans. Nou premye latak sete mont anler e tenny dife kot sa lakaz ti pe brile. Ler nou’n fini fer sa nou’n mont dan sa lakaz atase avek akoz nou ti krwar i annan posibilite dife i propaz anler dan plafon,» Msye Madeleine ti dir.

Servis tenny dife ti bezwen konbat dife dan plafon pour anpese ki i bril sa lot lakaz obor.

Merkredi swar dife ti osi bril en lakaz Baie Lazare.