Bann zofisye servis tenny dife ek sovtaz baze anvil lo Lari Latanier ek bann kot Erport Enternasyonal Sesel, Pointe Larue ti zwenn ansanm Sanmdi bomaten pour parade dan lavil pour montre piblik zot skil dan tenny dife ek sov dimoun dan danze e osi bann kalite kekipman ki zot annan e fason pour servi zot.

Sa parad ti tonb dan kad aktivite ki ti’n organize pour mark Lazournen Enternasyonal Ponpye ki ti selebre son lavey le 4 Me.

 

Sa bann ponpye avek zot kanmiyon e lezot lekipman ti ralye kot baz Lazans Sevis Tenny Dife ek Sovtaz lo Lari Latanier avan konmans parade an pasan par Laveni 5 Zen, Laveni Lendepandans, obor lorloz, Laveni Francis Rachel e vin fini kot Stad Popiler kot zot ti fer plizyer demonstrasyon avek bann lekipman ki zot servi pour tenny dife.

Dimoun ki ti’n desann anvil pour vin fer zot tranzaksyon Sanmdi ti atire par sa parad e bokou zot ti regroupe obor semen enpresyonnen pour regard sa ki ti pe pase.

Portparol Lazans Servis Tenny Dife ek Sovtaz, Msye Jones Madeleine ti dir ki parad ti pour montre piblik ki zot fer e osi montre sa linite ki annan ant sa de servis e fason ki zot travay ansanm pour donn en bon servis kominote.

Lo son kote depite sef zofisye ponpye baze kot erport, Msye Francis Quatre ti fer resorti ki sa de servis i travay bokou ansanm e zot bezwen bokou sipor kanmarad menm si sa ki zot fer pa dan lizye piblik.

«Sa bann demonstrasyon ki nou’n fer i montre ki nou bann sistenm ki nou servi i konpatib avek kanmarad e nou konpran louvraz kanmarad,» Msye Quatre ti fer resorti.

Ativite pour lazournen bann ponpye ti kontinyen avek bann levennman sportif e rekreasyonnel kot Exiles Club anvil e sa ti ale ziska tar dan apremidi.