Dife i konpletman detri en lakaz La Gogue
Lazans servis tenny dife ek sovtaz (SFRSA) in rikord son premye ka dife serye pour sa lannen. Sa ti en dife ki ti konpletman detri en lakaz de lasanm La Gogue yer bomaten.
Sa lakaz an tol ti pour Robin ek Philomen Joseph. Zot ti pe reste la ek zot de pti zanfan.
Ti ver 8er 45 ki Lazans servis tenny dife ek sovtaz ti ganny alerte par vwazen ki ti annan sa dife e dapre son portparol, Jones Madeleine, pa ti pran zot bokou letan pour ariv kot sa lakaz ki ti’n deza anflanm. Trwa masin tenny dife ti ganny deplwaye pour tenny sa dife.
Menm si sa lakaz ti sitye dan bafon, enpe elwannye ek semen, pa ti pran sa lazans bokou letan pour met sa dife anba kontrol e tenny li konpletman.
Msye Madeleine ti dir kantmenm zot ti reisi eparny dife kont en lakaz lapen obor sa lakaz.
Msye Madeleine ti osi dir ki sa lazans i annan en nide kote sa dife in kapab konmanse me zot bezwen etabli vreman si i sanmenm sa landrwa e osi kwa ki’n kapab koz sa dife.
Dapre temwen, ti napa personn kot sa lakaz ler dife ti konmanse. Msye Joseph, en travayer sekirite ki ti pe travay sa letan, ti dir ki i ti’n tenny tou bann keksoz elektrik ki ti’n devret ganny tennyen avan ki zot ti kit lakaz bomaten.
Antretan, ladministrater distrik Anse Etoile, Jenna Dubignon, ti dir ek zournal Seychelles NATION par telefonn ki lafanmir Joseph in ganny plase tanporerman dan ‘Kalifa Guest House’ Anse Etoile ziska ki zot a ganny asiste avek en lakaz permanan. I ti dir ki zot pe ganny tou lasistans neseser.