Dife i detri de lakaz obor kanmarad Mont Plaisir
Dife in konpletman detri de lakaz ki ti koste obor kanmarad.
Sa lensidan ti ariv granmaten Sanmdi anler Mont Plaisir dan distrik Anse Royale e zofisye relasyon piblik kot Lazans Servis Tenny Dife ek Sovtaz, Jones Madeleine, i dir zot ti ganny alerte ki i annan sa dife ver 6er15 Sanmdi bomaten e letan ki zot ti ariv dan sa landrwa toulede lakaz ti anflanm.
Dapre lenformasyon sa de fanmir ti’n esey telefonn nimero dirzans 999 osito ki zot ti’n vwar dife me pour en bon pe letan personn pa ti reponn zot lapel me letan zot ti ganny en larepons i pa ti enn ki ti donn zot en soulazman.
Enn sa lakaz zis striktir ki reste tandis ki lot i aplat ater.
Dapre Madanm Joanne Raoul sete loder lafimen ki ti lev zot ver 5er bomaten e deswit i dir son msye in esey tenny dife dan lakaz akote me lafimen sorti dan sa lakaz anflanm in anpes zot kapab esey sov enpe zot bann keksoz.
I dir zot ti zis gete kot zot lakaz i brile san kapab fer nanryen.
Madanm Raoul ki annan son pti biznes fer snacks kot son lakour i dir zot in perdi tou sa ki zot ti annan dan sa dife.
Msye Madeleine i dir lazans ti deplway en masin sorti Anse Boileau e de sorti anvil me ler zot ti ariv lo teren dife ti entans e malerezman dife ti’n propaze akoz in pran tro bokou letan pour zot ganny averti.
I dir ti pran zot anviron 30 minit pour met sa dife anba kontrol e anviron 2 erdtan pour tenny li konpletman.
Madanm Raoul, lo son kote, i dir si zot lapel pour lasistans ti’n ganny pran vitman zot ti ava kapab sov enpe zot bann posesyon.
Msye Madeleine i dir tou lapel ki antre lo 999 i devret ganny dirize vitman kot lazans konsernen e dan sa ka kot Lazans Servis Tenny Dife ek Sovtaz e sa ti ava permet zot azir pour evite ki dife i propaze e i dir i pa premye fwa ki zot ganny bann tel konplent e in osi dir zot ankor pe demande ki zot ganny en nimero ki ava permet zot azir pli vit posib.
Antretan, sa fanmir pe ganny asiste avek lotorite distrik Anse Royale e son bann partener me zot ekspekte ganny en lakaz dirzans Barbarons ozordi Lendi.
Marie Anne Lepathy