Dife brousay Port Launay i ganny met anba kontrol atan
Dife ki ti’n aparaman esape letan en dimoun ti pe netway en morso teren lo montanny dan bwa Port Launay yer apremidi, ti erezman ganny met anba kontrol atan avan ki i ti’n kapab fer plis dega.
Sa i vin apre ki Lazans Servis Tenny Dife ek Sovtaz ti mobilize vitman e dapre zofisye relasyon piblik sa lazans, Msye Jones Madeleine, ti anviron midi 34 ki zot ti ganny alerte konmkwa ti annan sa dife e zot ti mobilize vitman. Zot ti deplway en lekip e masin sorti kot stasyon Anse Boileau ki ti pran 30 minit pour ariv dan sa landrwa. Apre ki sa tim ti demann ranfor en lot lekip ti deplwaye sorti kot stasyon anvil. I dir ti pran zot anviron 45 minit pour met sa dife anba kontrol.
Fodre dir ki delo pour tenny sa dife ti ponpe dan en sours pa tro lwen kot sa dife ti pe pran e sa ti fasilit travay pour met sa dife anba kontrol. I osi annan rapor ki serten dimoun ki ti dan zalantour ti’n osi donn lanmen pour tenny sa dife avan ki zofisye tenny dife ti ariv lo teren.
Sa dife ti lo montanny pa tro lwen avek Manglier Estate ki trouve anfas avek lotel Ephelia e dapre rapor en zonm ti pe netway sa teren pour fer lagrikiltir.
I pa kler ki grander teren ki’n ganny devaste me parmi bann vezetasyon ki’n brile i plizyer pye palm.
Ver 3er apremidi sa dife ti’n fini tennyen me bann zofisye tenny dife ek bann travayer park nasyonal ti reste lo teren ziska tar pour asire sa dife ti’n vreman tennyen.
Marie-Anne Lepathy