En lanket in ouver pour determin lakoz en dife ki’n konpletman detri en bis SPTC ki pran karant pasaze.

Sa lensidan ti ariv Souvenir, La Misère ver 7er bomaten yer.

Sa bis, ki ti pe anmenn 35 pasaze asize, ti pran dife apre ki i ti’n fini arete lo ‘bus stop’ pour debark e pran pasaze. I ti sorti Anse Louis e pe desann anvil.

Tou sa 35 pasaze ki ti abor, enkli drayver, ti sorti sen e sof, e personn pa’n ganny okenn dimal.

Dapre zofisye divizyon sinyor (senior division officer) kot Lazans Tenny Dife ek Sovtaz (SFRSA), Jones Madeleine, zot ti ganny alerte lo sa lensidan anviron 6er58 bomaten e deswit de masin tenny dife ti ganny deplwaye pour asiste.

I ti rakonte ki ler zot ti ariv laba, dife ti’n fini anvair bis antye. I ti pran zot 3 minit pour met li anba kontrol e 10 minit antou pour tenny li konpletman.

I ti fer remarke ki dapre konpran, dife ti konmans devan kot masin e propaz deryer dan bis.

I ti note ki kalite materyo ki sa bis in ganny fer avek anplis bann lezot ki dan bis, in kapab ede pour fer dife propaz vreman vitman.

Lo son par, sef loperasyon kot SPTC, Geffy Zialor, sa bis ki ti ganny aste an 2008, ti’n fek fer son servis le 22 Septanm e i osi ekipe avek lekipman tenny dife (fire extinguisher) ki drayver malerezman pa’n ganny sans servi vi ki mannyer dife in propaz vitman.

I ti fer remarke ki sa lensidan dife ti en ka izole e in reasir manm piblik ki tou bann bis SPTC zot ganny byen mentenir e zot ‘safe’ pour anbark ladan.

I ti eksplike ki sa bis ti ganny ranplase par en lot vi ki sa larout i en larout prensipal.

Msye Madeleine ti osi anonse ki zot ti bezwen entervenir ver 9er29 bomaten, yer menm, pour retir en drayver ki ti’n pri dan en pti ‘pick-up’ blan, 1 tonn edmi, apre ki en gro brans mang ti’n tonm lo son transpor La Louise.

Sa zonm 65-an, ki ti pe sibir enpe douler, ti ganny transporte par lanbilans e in admit Lopital Sesel kot son kondisyon in ganny dekrir konman stab.

Source