Dife i parsyelman bril en veikil Hyundai H1 kot Orion Mall
En veikil Hyundai H1 ti pran dife kot Orion Mall dan lavil Victoria yer, anviron 11er05 a 11er10 bomaten.
Sa veikil ki dapre bann rapor e temwen i pour lakonpannyen Creole Travel Seychelles, ti pe pase dan car park letan ki lafimen ek laflanm ti komanse dan son konpartiman masin. Annefe, sa lensidan in ariv zis en pti pe pli devan ki enn bann lofis sa lakonpannyen dan sa batiman.
Dapre Msye Giovanni Gabriel, en zofisye tenny dife ek softaz ki baze lo erport me ki pa ti pe travay a sa moman, i ti pe asize obor lofis Lotorite Laysenns letan ki i ti santi en loder lafimen.
I dir ki i ti remarke ki sa loder ti pe sorti dan sa transpor ki ti pas obor li, e ki i ti deswit vwar dife flanbe devan sa transpor.
«Deswit mon’n taye pour al rod en extinguisher e mon ti ganny enn anndan kot lofis Creole Travel Seychelles menm, e mon’n servi sa pour esey pez enpe dife,» i ti rakont medya.
Malerezman, menm si i ti reisi kontrol enpe laflanm, sa pa ti ase pour konpletman tenny sa dife, me pa bokou letan apre ki bann zofisye Lazans Servis Tenny Dife ek Sovtaz ti ariv dan sa landrwa, e tenny sa dife.
Dife ti’n konpletman tennyen ver 11er25 bomaten, menm si bann zofisye lapolis ti’n arive pour kontrol akse bann motoris, osi byen ki pyeton otour sa veikil.
Msye Gabriel ti osi azoute ki si ti annan bann lezot zouti dan sa batiman, tel ki extinguisher ek rakor delo, i ti’n kapab fer plis pour met sa dife konpletman anba kontrol, ouswa menm tenny sa dife pli vit.
Sa veikil in andomaz plito lo devan kot konpartiman masin ki’n bril bokou, tandis ki deryer i ase entak.
Serten lezot veikil ki ti obor in osi ganny bann pti domaz.