Dife i detri 2 lakaz obor kanmarad Beau Vallon
De (2) lakaz atase avek kanmarad dan distrik Beau Vallon e ki ti pe abrit plis ki 20 dimoun dan 7 lasanm antou ti konpletman detri par dife yer zis avan 10er bomaten.
Erezman menm si ti annan dimoun kot sa 2 lakaz personn pa’n ganny dimal me i annan ki’n bezwen ganny trete pour sok.
Vi ki sa 2 lakaz i zis par deryer stasyon petrol Beau Vallon, sa stasyon ti bezwen fermen tanporerman pandan ki bann azan Lazans Servis Tenny Dife ek Sovtaz ti pe tenny sa dife konpletman.
Zofisye relasyon piblik Lazans Servis Tenny Dife ek Sovtaz Msye Jones Madeleine i dir apre ki zot ti’n anrezistre sa lapel ki i annan sa dife anviron 9er50, ti pran zot mwens ki 10 minit pour ariv dan sa landrwa e ler zot ti arive sa 2 lakaz ti konpletman anflanm.
Apard enn de pti keksoz, konteni sa 2 lakaz in konpletman detri e zot striktir beton menm si i ankor debout in osi fini ganny afekte.
Msye Madeleine i dir dapre lenformasyon ki zot in ranmase ziska aprezan, dife in aparaman konmans dan en fàn ki apre in tonb lo en lili e deswit dife in propaze. Lanket pe kontinyen dan sa enn ka dife.
[Source: Seychelles Nation]