En zonm aze 89-an, Guy Savy, in mor apre ki dife ti bril li dan lakaz kot i ti pe reste Copolia.

Sa lensidan ti ariv apre 4er apremidi yer e portporal Lazans Servis Teny Dife ek Sovtaz (SFRSA) Jones Madeleine ti dir ki zot ti ganny sa rapor ver 4er35 apremidi e zot ti deplas trwa kanmiyon ek en bowser.

I ti azoute ki ti selman letan ki zot ti’n ariv kot sa landrwa ki zot ti aprann avek vwazen ki ti annan en zonm dan lakaz.

Dapre temwen, carer Msye Savy ti’n fini ale letan sa lensidan ti arive e Msye Savy ti li tousel dan lakaz ki ti an blok ek an tol.

Dapre rapor, 4 dimoun ti reste dan sa lakaz.

Antretan yer bomaten, dife ti parsyelman detri en lakaz North East Point.

Erezman bann zofisye Lazans Servis Tenny Dife ek Sovtaz ti ariv atan pour anpese ki sa dife i propaze e separasyon beton sa lakaz ti osi ede pour anpes sa dife fer plis dega. 

Msye Madeleine i dir pa ti pran zot bokou letan pour tenny sa dife.

I ti fer resorti ki en fakter ki’n ede se ki sa lakaz son bout anba i annan en floor beton ki’n anpes dife propaz anler e osi lefe ki servis tenny dife in ganny alerte boner in ede pour anpes sa lakaz bril an antye.

«Nou ankor pe touzour demann dimoun pour pran bokou prekosyon kot zot lakaz, fer atansyon bann keksoz ki zot fer pour anpese ki en dife i konmanse dan zot labsans,» Msye Madeleine in dir.

«Nou pa ankor konklir egzakteman ki’n arive me nou annan laprev kote dife in konmanse me lanket ava determinen ki fason in konmanse,» Msye Madeleine in dir.