Dife Coetivy
Lakonpannyen Devlopman Zil, IDC, in konfirm en ka dife brousay lo zil Coetivy. Sa lensidan ti ariv Dimans dan zanmerant ansyen hatchery ek runway.
Sete en prizonnyen ki ti pe rod zerb ki ti war dife pe manz anba dan bann fouzer e i ti alert manager zil. Deswit lekip IDC ti mobiliz son bann resours pour konbat sa dife.
Avek sa letan sek e pour anpes dife propaze, bann travayer ti bezwen fer balizaz. Manager Coetivy i dir dife in bril en bon pti pe vezetasyon dan sa zanmerant.
Yer bomaten bann travayer in fer en lot letour pour fini tenny bann pti labrez ki ti ankor pe alimen. Apard bann plant ki’n brile, in napa okenn lezot domaz.