De lensidan dife ti ganny raporte sa semenn – enn dan distrik Pointe Larue e lot lo La Digue.

Dan sa lensidan Pointe Larue, dife ti detri en lakaz konpletman Merkredi swar.

Sa fanmiy ki ti reste dan sa lakaz trwa lasanm Nageon Estate pa’n ganny sans sov nanryen dan zot lakour.

Me erezman napa personn ki’n ganny blese pandan sa dife.

Dapre portparol Lazans Servis Tenny Dife ek Sovtaz Jones Madeleine i paret ki ti napa personn kot lakour kan dife ti pran vi ki ti en vwazen ki osi en zofisye servis tenny dife ek sovtaz ki ti raport sa dife ver 5:26 apremidi.

“Ti pran apepre 20 minit pour kanmiyon ariv lo lasenn e ler bann zofisye ti ariv laba lakaz ti’n konpletman brile. Mon bezwen fer remarke ki ti annan trafik dan semen vi ki ti annan en aksidan alor sa in fer nou ganny retar,” i ti dir.

Msye Madeleine ti dir ki lakoz sa dife pa ankor determinen pandan ki lanket i ankor pe ganny fer.

Dan sa lot lensidan pli boner sa semenn dife ti pran dan en stor lo La Digue.

“Erezman bann zofisye ti ariv atan e se zis premye letaz ki’n ganny andomaze e dezyenm letaz ti entak,” Msye Madeleine ti dir.

Msye Madeleine pe demann manm piblik pour pran plis prekosyon espesyalman la pandan ki letan festivite pe aprose.