Dife i parsyelman detri en lofis dan Maison de Malavois
Servis litilite piblik (PUC) ti fer fas pandan wikenn avek en lensidan dife ek poto elektrik tonbe swivan en deboulir later.
Lazans servis tenny dife ek sovtaz (SFRSA) ti bezwen entervenir Sanmdi bomaten pour tenny en dife dan en lofis lo premye letaz kot batiman administrativ PUC, Maison de Malavois ki sitie lo Laveni Bois de Rose. Sa dife ki dapre konpran ti’n konmans dan plafon, in parsyelman detri sa plafon enkli serten bann lekipman ki ti dan sa lofis.
Dapre sef egzekitif PUC Philippe Morin, ki ti ganny alerte lo sa lensidan dife ver 7er 20 bomaten, ti napa personn dan batiman ler dife ti pran eksepte sekirite ki ti deor pe vey sa batiman.
Msye Morin ti dir ki napa gran domaz me in anmenn en kou ki PUC pa ti’n prevwar.
Zofisye relasyon piblik kot SFRSA, Jones Madeleine, ti dir ki menm si zot ti’n etabli ki sa dife ti’n konmans dan plafon, zot pou kontiny zot lanket pour rode kwa ki’n kapab koz sa dife.
I ti dir ki sa dife pa’n propaz vit akoz sa plafon ti’n ganny fer avek en materyo ki tarde brile e sa in evit plis domaz.
Dapre Msye Morin, bann travayer sa lofis ek bann dan lezot lofis obor in ganny transfer kot Electricity House, Roche Caiman ziska ler travay reparasyon i fini.
Sa lot lensidan ti de poto elektrik ki ti tonbe Anse Faure ek Les Canelles.
Sa poto Anse Faure obor ansyen diskotek Katiolo ti tonbe swivan en deboulir later apre gro lapli Vandredi. Sa ti okazyonn en koupir kouran dan sa rezyon.
Apre ki Msye Morin ti pronons son lekor boner lo en lot lensidan kot en trasnpor ti’n may dan en difil ki pa ti pour PUC e zet zot poto elektrik ater Les Canelles Sanmdi menm, en zofisye PUC, Daniel Assan, ti konfirmen yer bomaten ki sa poto antye ti pour en lot lakonpannyen e pa pour PUC.
Msye Assan ti dir ki depi Sanmdi menm zot ti sanz sa poto Anse Faure e ver 1er apremidi kouran ti’n retournen dan sa rezyon ki ti’n ganny afekte depi 7er bomaten.