Dife lo en parti landfill La Digue
En dife ase entans ti ganny raporte lo en parti landfill l’Union Estate,La Digueyer granmaten apre ki bann zabitan dan sa rezyon ti’n santi e vwar gro lafimen.
Responsab relasyon piblik kot Lazans Servis Tenny Dife ek Sovtaz, Msye Jones Madeleine, in dir ki ti anviron 5.40 bomaten ki stasyon ti ganny enformen lo sa dife e en masin ti ganny deplwaye pour al verifye me ti bezwen demann ranfor akoz dife ti ase gro e entans.
“Sa dife menm si i pa ti lo en tro gran sirfas, i ti dan fon. Ti avek led en excavator ki ti vir salte anba lao ki sa dife ti ganny met anba kontrol dan anviron 1erdtan avan i ti tennyen konpletman 4erdtan plitar,” Msye Madeleine i dir.
Apre sa zot in kontinyen fer bann swivi toule erdtan pour asire ki dife pa repran.
Msye Madeleine i dir i pa ankor kler kwa ki’n okazyonn sa dife me i posib ki i’n pran lo limenm a traver dekonpozisyon bann diferan kalite salte ki annan lo sa landfill.
Lo son kote sef egzekitiv lazans ki zer salte, Msye Flavien Joubert, ti dir avek SBC ki ti annan bokou plis lafimen akoz sa bann kalite salte kot dife ti’n pran e bann zofisye tenny dife ti bezwen konbat sa dife atraver gro lafimen entans.
Source: Seychelles Nation