Lazans Servis Tenny Dife ek Sovtaz i ekspekte azout de nouvo kanmiyon dan son laflot an Avril
Kantite ka dife dan batiman in redwir lannen pase
Konpare avek 2018 kot ti annan 54 ka dife dan batiman, lannen pase, 2019, Lazans Servis Tenny Dife ek Sovtaz in rikord mwens ki 30 ka dife dan batiman ki en rediksyon anviron 50%.
Sete zofisye relasyon piblik e portparol sa lazans Msye Jones Madeleine ki ti donn sa bann sif sa semenn letan i ti pe fer en bilan lo bann ka dife pour 2019.
Msye Madeleine in dir ki kantite ka dife batiman ki’n annan lannen pase in redwir konsiderableman konpare avek lannen 2018 e sa in fer ki lannen pase Lazans Servis Tenny Dife ek Sovtaz pa’n sitan okipe e in dekri lannen 2019 konman enn ki’n plizoumwen kalm e trankil pour Lazans Servis Tenny Dife ek Sovtaz.
«2019 in en lannen ki’n ase kalm pour fire service malgre bann defi ki in anmennen me nou’n ganny en bes dan kantite calls ki’n antre kot fire service. Bann fakter ki mon krwar in ede enn se bann lantrennman ki nou’n fer e sa in ogmante pour sorti 4500 dimoun par lannen pour ariv plis ki 6000. Lo kote lenspeksyon, menm si nou annan enpe konstrent lo kote zofisye servis tenny dife, kot par ler nou’n bezwen retard louvraz serten lofis pour kapab ranplas dan loperasyon, sa in ede pour redwir enpe bann lenspeksyon ki nou fer,» Msye Madeleine in dir.
«Si nou ti annan plis lenspeksyon petet ti ava annan mwens risk kot dimoun ti ava ganny notifye lo bann prekosyon ki zot devret pran pour anpes dife pran,» Msye Madeleine in fer resorti.
Me Msye Madeleine in dir ki parmi bann diferan lakoz dife ki zot in rikorde dan bann batiman i ankor annan dife koze par neglizans.
«I ankor annan dife neglizans kot dimoun i bliy pwalon lo dife, zot kit gas ouver, labouzi alimen san sirveyans, dan bann laundry i annan ka kot dimoun i zis tir lenz dan dryer e pa tennyen e la lasaler i akimile e koz en dife.»
Me malgre tousala Lazans Servis Tenny Dife ek Sovtaz pe kontiny son zefor pour amelyor kalite servis ki i donn piblik e sa i atraver plis formasyon pour son bann zofisye ki tenny dife e i osi annan plan pour azout plis kanmiyon tenny dife dan son laflot.
«Pli tar Avril nou ekspekte ganny de pli pti masin/kanmiyon tenny dife pour azout dan nou laflot. Sa de kanmiyon pou kapab ariv dan bann landrwa pli vit akoz zot pou pli pti e kapab pas dan nenport pti santye ki pli pros avek en lensidan dife ki nou ti pou kapab arive avek bann kanmiyon ki nou annan konmela,» Msye Madeleine in dir.
Konsernan plan formasyon sa lazans, Msye Madeleine in fer resorti ki i reste pour kontinyelman elev kalite servis e sa i lo tou nivo ki swa management, loperasyon ek lezot pour fer ki servis ki zot donn piblik i pli profesyonnel me in fer resorti ki mank mendev kalifye i osi reste en defi pour sa lazans.
Marie-Anne Lepathy