Dife i detri en pti lakaz Belonie
Dife ti Sanmdi bomaten konpletman detri en pti lakaz an tol Belonie dan ki trwa dimoun ti pe reste.
En temwen ti dir ki ti dan bann 10er bomaten ki sa dife ti konmans pran dan sa lakaz e i ti’n konmans ede pour tenny li avek en rakor delo e osi ed sa bann dimoun retir enpe keksoz personnel parey lenz dan sa lakaz avan ki bann zofisye Lazans Servis Tenny Dife ti arive en pti pe letan apre.
Dapre zofisye relasyon piblik kot sa lazans, Msye Jones Madeleine, zot ti ganny alerte lo sa dife ver 10.25 bomaten e lazans ti deplway trwa kanmiyon pour konbat sa dife e letan zot ti ariv dan sa landrwa sa lakaz ti deza anflanm.
Msye Madeleine i dir erezman personn pa’n ganny dimal dan sa dife ki ziska prezan pa kler ki mannyer in konmanse.
I dir en lanket pe deroule pour konn lakoz sa dife.
Marie-Anne Lepathy