En madanm aze 48-an, Julie Adrienne, in perdi son lavi dan en dife dan en apartman dan en blok flat Les Mamelles yer gran maten e en lanket i ankour.

Dapre portparol Lazans Servis Tenny Dife ek Sovtaz, Jones Madeleine, zot ti ganny alerte ver 4er35 gran maten lo sa lensidan kot zot ti osi aprann ki ti annan en dimoun ki ti’n pri anndan.

Trwa masin tenny dife ti ganny deplwaye kot sa blok flat de letaz avek sis apartman dan leo Les Mamelles.

I ti dir ki ler zot ti arive, bann vwazen obor ti’n fini tenny sa dife.

Touzour dapre Msye Madeleine, dife ti’n pran zis dan sa lasanm kot sa madanm ti ganny retrouve mor. Lezot landrwa dan sa apartman de lasanm, ki trouve lo bout, lo dezyenm letaz, pa ti’n ganny touse par dife.

I ti dir ki Lazans Servis Tenny Dife ek Sovtaz ansanm avek lapolis pe fer lanket pour etabli kwa ki’n koz sa dife ek lanmor sa madanm.

Si Msye Madeleine pa ti oule devwal laz sa madanm e osi si ti annan ankor dimoun ki ti pe reste dan sa apartman, parmi lezot lenformasyon, lapolis ti konfirmen plitar dan lazournen ki egzaminasyon fer lo lekor Madanm Adrienne in montre brile serye lo parti anler son lekor enkli son figir ki’n koz son lanmor.

Touzour dapre lapolis, levidans ranmase depi ki lanket in konmanse yer bomaten apre sa dife avek letopsi ki’n swiv apremidi, pa montre okenn akt malisye dan lanmor Madanm Adrienne e ki lakoz son lanmor i mank ler e toufe (mechanical asphyxia and suffocation).