De madanm ti bezwen ganny anmennen lopital Anse Royale kot zot ti ganny trete pour sok apre ki dife ti konpletman detri en lakaz ki zot ti pe reste ladan Les Cannelles, Anse Royale.

Lazans Servis Tenny Dife ek Sovtaz (SFRSA) ti ganny alerte lo sa dife ver 8.45 yer bomaten e deswit zot ti deplway en masin tenny dife sorti anvil e de lezot masin sorti kot stasyon servis tenny dife Anse Boileau.

Dapre zofisye relasyon piblik sa lazans, Terrence Arnephy, ler sa trwa masin ek sa nef zofisye tenny dife ti arive, sa lakaz ki ti an de parti azoute ansanm – enn an blok e lot an tol – ti deza anflanm.

I dir ti pran zot anviron 10 minit pour met sa dife anba kontrol avek ankor en kenzenn minit pour tenny li konpletman.

Ti napa nanryen ki ti ganny sove dan sa de lakaz.

Ti pran sa de masin sorti Anse Boileau anviron 8 minit pour arive tandis ki sa enn ki ti sorti anvil ti pran en kenzenn minit.

Ti annan trwa dimoun ki ti pe reste dan sa bout lakaz prensipal ki ti an blok tandis ki sa lot bout azoute an tol ti pe ganny lwe avek en madanm ek son fiy.

Enn parmi sa de madanm dan lakaz blok prensipal ti nobou sorti lo limenm tandis ki sa lot ki reste lo lili e ki pa marse (bedridden), ti ganny retire par son garson.

Msye Arnephy i dir ki en lanket in ouver pour konn lakoz sa dife.

Antretan, Tacianna Docteur, ladministrater distrik Anse Royale, i dir ki sa de fanmir in ganny plase kot Reef Apartment, Anse Aux Pins, ziska ler zot ganny asiste avek en lot landrwa reste.

Manm Lasanble Nasyonal pour distrik Anse Royale, Sylvanne Lemiel, in osi lans en lapel avek nenport dimoun ki kapab, pour ed sa de fanmir avek nenport keksoz ki zot kapab akoz zot in perdi tou dan sa dife.

Bann portre ki akonpanny lartik i montre en pe dega ki sa dife in okazyonnen.

 

Patrick Joubert