Lazans ServisTenny Dife ek Sovtaz pe demann manm piblik pour respekte lord Minister Lagrikiltir, Sanzman Klima ek Lanvironnman ki anplas ki defann met dife dan sa letan lasesres.

Sa i vin apre en dife ki ti ganny mete yer apremidi pandan en netwayaz kot en propriyete prive Machabée, Glacis, e kot sa lazans ti bezwen entervenir apre pour tenny sa dife pour anpes li propaz plis apre ki i ti sape e propaze lanmenm dan balizaz.

Paul Faure, en zofisye kot sa lazans ki ti pe ansarz loperasyon, ti dir ki en warning oubyen en sarz sorti kot departman lanvironnman pou posibleman ganny mete kont sa ki responsab pour kas lord ki defann met dife dan sa letan sek.

«Zot ti sipoze zis fer zot netwayaz, kit zot salte lanmenm e esper ler sa restriksyon i ganny leve pour zot kapab bril sa bann salte si zot ti anvi,» Msye Faure ti dir.

Sete ver 2er edmi ki sa lazans ti ganny en koud telefonn konsernan sa dife e en masin tenny dife ti ganny deplwaye lo teren.

Ti pran sa masin anviron 15 minit pour ariv laba e 5 minit pour pez sa dife e anpes li fer gro laflanm.

Me vi ki i ti pe kontinyen pran akoz bann ros so anba sa ta lapay ki ti pe ede pour fer li kontinyen alimen, delo dan sa masin pa ti ase pour kontenir sa dife e en kanmiyon delo sorti kot sa lazans ti bezwen monte pour donn lasistans. Sa ti akoz sa masin tenny dife ki ti lo teren pa ti kapab ganny akse avek delo dan sa de ‘water hydrant’ dan semen akoz delo ti’n koupe anvi restriksyon dan sa moman lasesres.

«Ti pou tro tar pour esper delo vini 4er. Delo ki dan sa kanmiyon ki ti pe vini ti pou ase pour tenny sa dife konpletman,» Msye Faure ti dir.

Ler sa kanmiyon delo ti arive apepre 15 minit ki i ti’n kit stasyon sa lazans lo Lari Latanier, ti pran bann zofisye tenny dife anviron 50 minit pour tenny sa dife.

Patrick Joubert