Lazans Servis Tenny Dife ek Sovtaz ti bezwen entervenir pour tenny en dife salte ki ti pe brile yer apremidi lo en sit ki ti pe ganny netwaye pour fer en proze lwe bato lwazir lo Zil Perseverance. Sete son met sa bout later, Msye Charles Savy, ki ti apel Lazans Servis Tenny Dife ek Sovtaz apre ki i ti’n eseye me pa ti kapab tenny sa dife. Sa dife i pa ti enn ki ti sap li me enn ki i krwar in arive par aksidan par bann dimoun ki pas lo sa propriyete oubyen ganny mete par ekspre par sa bann menm dimoun ki abitye vin lo son propriyete pour fer bann aktivite ilegal e i ti bezwen pous zot pour li kapab konmans netway son landrwa.

Msye Savy ti eksplike ki i ti annan son permi met dife e Lendi ler i ti pe bril bann salte dan en gran trou ki i ti’n fouye, lapolis ti vin kot li pour dir li tennyen akoz lafimen ti pe afekte manrmay kot lekol segonder. I ti dir ki i ti tenny sa dife konpletman e ganny en lagreman pour met dife dan wikenn ler napa lekol.

I ti fer remarke ki ti napa okenn konplent dife oubyen lafimen pandan sa de zour ki’n swiv e ki i ti byen soke ler ladministrater distrik ti telefonn li ver 2er30 apremidi yer pour dir li ki i annan dife lo son propriyete. «Mwan mon konnen mon pa’n met dife e se pour sa rezon alors ki mon krwar ki swa bann dimoun ki’n travers la zot in kapab zet bout sigaret la oubyen sa bann delenkan ki frekant la in alim sa dife par eskpre,» i ti dir. Pa ti pran sa kat zofisye tenny dife ki ti ariv dan sa landrwa ver 3er10 avek en masin tenny dife, bokou letan pour tenny sa dife ki pa ti grav ditou. Me toudmenm en lanket pe ganny fer pour konnen ki mannyer sa dife in kapab konmanse.