Dife i andomaz salon dan en apartman
Dife in parsyelman detri en morso dan en apartman prive de lasanm, Mont Fleuri, yer apremidi.
Sel parti sa apartman ki’n andomaze i salon.
Lazans Servis Tenny Dife ek Sovtaz (SFRSA) ti ganny rapor sa lensidan ver 4er46 apremidi e ti deswit deplway trwa kanmiyon tenny dife, enkli de fire tender e en bowser, avek onz zonm.
Dapre portparol Terrence Arnephy, in pran lekip apepre 7 a 10 minit pour konpletman tenny sa dife, vi ki de sivilyen ti’n fini lans latak inisyal e met dife anba kontrol an servan en fire hose reel kot sa batiman.
Sa apartman de lasanm i trouve anler dan en blok kat younit, e i sel apartman ki’n ganny afekte.
Menm si sa madanm e son zanfan ki reste dan sa apartman ti dan lakour o moman ki dife ti konmanse personn pa’n ganny blese.
«Nou remersye bann dimoun ki’n konmans fer en keksoz touzour, akoz ti deza annan bann mezir proteksyon lo sa batiman tel ki fire hose reel, e smoke detector osi in marse,» Msye Arnephy ti dir.
En lanket in ouver pour etablir lakoz e sirkonstans sa dife.
I mandatwar pour bann batiman komersyal annan bann mezir prekosyon kont dife, dapre bann rekonmandasyon sa lazans.
«Bann rekonmandasyon i pour bann mezir tel ki fire extinguishers, fire hose reels, smoke detectors, e fire alarm, bann keksoz ki si en dife i arive, bann dimoun ki lo sit i kapab lans en latak inisyal touzour, pour anpes dife propaz plis, anmezir ki lazans pe vini pour asiste,» Msye Arnephy ti azoute.
Pour le moman, manda lazans pa kouver bann lezot propriyete rezidansyel prive, menm si i pare pour ofer gidans avek okenn dimoun ki enterese swiv sa bann mezir.