Dife i detri en lakaz Reef Estate
En dife in konpletman detri en lakaz an blok trwa lasan ver 11er bomaten yer.
En zonm ek son manman aze 85-an ti pe reste dan sa lakaz e sa madam ti ankor dan lakaz letan sa dife ti pran me i ti reisi sove avek led ban lezot dimoun avan ki Lazans Servis Tenny Dife ek Sovtaz ti arive.
Dan sa lakaz ti annan detrwa prodwi parey larou, ki’n sirman ede propaz sa dife.
Dapre portparol Lazans Servis Tenny Dife ek Sovtaz, Jones Madeleine, sete ver 11er12 bomaten ki stasyon tenny dife ti resevwar en kou-d-telefonn konmkwa ti anan en dife Reef Estate.
Msye Madeleine ti azoute ki deswit zot ti deplway trwa masin pour al konbat sa dife.
«Sa madanm aze 85-an ti ankor dan lakaz letan dife ti pe pran, erezman avek led bann lezot dimoun, personn pa’n ganny blese dan sa lensidan dife. Sa madanm ti ganny transporte lopital pour resevwar tretman pour sok,» Msye Madeleine ti dir.
Msye Madeleine pe lans lapel avek piblik pour pran plis prekosyon ek responsabilite avan zot kit zot lakaz dan bomaten.